Saturday, March 06, 2004
دره‌نگێك له ئیش هاتمه‌وه. له ناو قه‌تاره‌كه‌دابه‌رامبه‌رم ژنێك دانیشتبوو. ته‌مه‌نی ده‌ورووبه‌ری چل ساڵێك ئه‌بوو. ژنێكی كه‌ڵه‌گه‌تی باریك ئه‌ندام بوو. قژێكی درێژی زه‌ردی هه‌بوو كه به‌سه‌ر شان و ملیدا په‌خش بووبووه‌وه. دوو چاوی گه‌وره‌ی شین و ده‌مولێوێكی قه‌ڵه‌وی هه‌بوو. پانتۆڵێكی چه‌رم و پاڵتۆیه‌كی فه‌روداری له‌به‌ردا بوو. جله‌كانی گه‌رم بوون. له جله‌كانی گه‌رمتر نیگاكانی بوون، ده‌موچاوی پڕ بوو له بزه و گه‌شی. پاش ماوه‌یه‌ك ته‌له‌فوونه ده‌ستیه‌كه‌ی له جانتاكه‌ی ده‌رهێنا و ته‌ماشایه‌كی كرد.
ته‌له‌فۆنه‌كه‌ی خسته‌وه ناو جانتاكه‌ی، دیسانه‌وه ده‌ریهێنا و ته‌ماشایه‌كی تری كرد و دیسانه‌وه له جانتاكه‌ی كرده‌وه. بۆ جاری سێیه‌م ده‌ریهێنا و زۆر به نه‌رمی شاشه‌ی ته‌له‌فۆنه‌كه‌ی ناز كرد و ته‌ماشایه‌كی ده‌ره‌وه‌ی كرد و پاشان من، بۆم پێكه‌نی و سه‌رێكی ڕاوه‌شاند. ئه‌مجاره‌یان به نادڵنیاییه‌وه ته‌له‌فۆنه‌كه‌ی خسته‌وه ناو جانتاكه‌ی. ساتێكی پێنه‌چوو ده‌ریهێنا، ئه‌مجاره‌یان زۆر به په‌له ده‌ستی كرد به نووسینی په‌یامێك. په‌یامه‌كه‌ی نووسی، ته‌ماشایه‌كی كرد، ده‌ستی به شاشه‌كه‌دا هێنا و هه‌ناسه‌یه‌كی هه‌ڵكێشا؛ چاوه شینه‌كانی بوون به ده‌ریایه‌‌ك، فرمێسك تێیدا شه‌پۆلی ئه‌دا. په‌یامه‌كه‌ی نارد... ته‌له‌فۆنه‌كه‌ی خسته‌وه جانتاكه‌ی و چاوه‌كانی لێكنا... بزه‌ی سه‌رلێوی هه‌موو ده‌موچاوی ڕووناك كردبووه‌وه.